cerita luccu tentang hempon

Na hudok disi, asa manat be molo mamakke akka peralatan canggih sisaonari, ai olo do berengon songon na germe, hape gabe balga hasesegana,……nga tok jim i

Molo najolo, lao pasahathon tona iba tu sasahalak, ikkon marhite surat do, isa so i marhite soara, boi dohonon goarna ihot-ihot ninna. Olo do dilean songon tanda parningotan di sasadari. Isarana rupani, molo marulaon dongan huta, pintor ro do raja huta manang raja bius manggokhon tu sude pangisi ni huta i. Marhite suruanna, dilehon do tahe parnapuranon, ima songon partanda, pangihot ni ari dohot partingkian manang andigan ulaon i dipatupa. Didok suruan ni raja i, marulaon do dongan sahutatta ani andona, dibulan adona, songon ingot-ingot dihita, adong do dipasahat nasida napuran.

Alai dijaman sisaonari on, dang haru masa pe songoni, harotas undangan nama dibahen, dungi dilehon ma getep songon ingot-ingot na.

Jaman marganti muse, nunga lam maju pe akka pamikkirion ni jolma, nang akka ugasan ni jolma pe taringot tu ngot-ingot on nunga marragam be. Molo songon jaman saonari, di gana jolma do mambaen hempon, ima telepon na boi binoan manang tudia, nisakku-sakuan. Ima sada ugasan, manang alat na boi pasahathon suaratta tu donganta na adng disihadaon, naso niida jala naso tuk sahat soaranta. Ulaon na asing muse sian ugasan on, boi do tong dibaen gabe ingot-ingot, didok ma goarna alarm, jadi boi do antong ni totophon ibana, manang andigan ibana makkuling. Isarana molo naeng marpesta siadui tolu minggu nai, nunga boi binaen di hempon on asa mangkuling manang paboahon tu hita, na satokkin na nama ulaon.

Nanaeng sipatariashononhon tu hita ima taringot tu hempon on ima gabe na olo mambaen sada rumatangga gabe sala mansiantusan, na gabe marbadai akka namardingan saripe. Molo dijaman saonari on, pasahathon tona tu sasahalak dang pola be ikkon suruon jolma gabe parsuru niba pasahathon tona songon nahudok diginjang, jala dang porlu be adong surat. Sukkup do holan marhite sian hempon i, didok ma i es em es, ima songon sada tona marhite hempon. Alai heado tong songoni, marbadai namarrumatangga, ima amanta si Hasiholan, ima sada songon pejabat disada perusahaan na balga. Tutu do nian, anggo sian parrohaon dohot sian leak ni bohi, ai jolma siappinan do ibana, jolma na burju do jala anak ni amana do ibana.

Dan olo marroha-roha na asing diparngoluon siganup ari, halak na pantun do ibana, dibahen i do tung mansai godang do marlomo ni roha mida ibana, jala muse jabatanna pe diparkarejoanna nunga tung na denggan. Molo dijaman sisaonari on, biasa do songon sada pejabat adong sekretarisna, jala si Hasiholan pe dilean perusahaan i do songon skretaris di ibana, asa adong mangurupi ibana makkarejoi sikarejoonna.

Songon na hudok nakkin, ala jolma na burju do ibana, dipaboa ibana do tu tungganeboruna manang ise sekretarisna, ai ro do tu pikkiran ni ibana, molo tung rappak ibana lao dohot sekretarisna on, asa unang marbohadia niolina i. Mardomu, sada anakboru na uli situtu do tahe sekretaris ni si HAsiholan on jala halak hita do muse, ima mangurupi ibana karejo di kantorna.

Di nasadari, tinggal do hempon ni ibana di jabu, ala tarlambat dungo, jadi humalaput do ibana lao tu parkarejoanna. Hape di potang ari i, makkuling ma hepon on di bilut na sida, paboahaon naung adong di jalo sada es em es. Nian, dang na sangajo Inanta ni ibana mambukka hempon on, alai na rodo tu pikkiran ni NAi Olopan, ima tungganeboru ni sihasiholan on mandok dirohana, “Ah..tahe, atik boha adong barita na rumingkot situtu, atik boha porlu situtu tu parkarejoanna, hu jaha ma jo isi ni surat on, bah molo porlu do, ni telepon innon tu kantor paboahaon ” ninna NAi Olopan, huhut ma dibukka jala dijaha ibana es em es on.

Songgot ma tu rohana, bolak-bolak bohina, jala humitir ma tanganna manjaha isini es em es on didok disi
” Sayang, nanti pulang bareng yah, udah kangen nih, atau kalau nggak ketemu ditempat biasa ya, miss you…”

Bah!! nga ro jea, ai naung mangulahon na so tama do naeng ibana? sai manginongi do dibagasan rohani NAi Tolopan, ido tutu, ise naso sukkun-sukkun molo adong hata songoni tu nioli niba. Alai dipasip ibana do, dipaima mulak si Hasiholan sian kantor.

Dung sahat dijabu, dang tor kopi manang na tes manis diparade, pin tor muruk do NAi tolopan tu ibana, didok ma ” Ndang uhum be na binaen mon, nunga mambaen na sosuman ho, dang hupikkir ikkon songonon baenonmu tu ahu” huhut ma manetek iluna jala dipatudu es em es on.

“aha namasa? ” huhut ma dijaha es em es on, jala dibereng ma ise na makkirim si Marsinta, ima sekretarisna i.

“Na sala nomor, sala makkirim do i….na tu halletna do ra naeng kirimonna, hape gabe tu au” ninna Si HAsiholan
“Ndang tutu i, sian dia do hea halak sala kirim, ai takkas do binoto, tikki adong ulaon ni kantor muna, bah si Bonar do goarni halletna, hape ho, goarmu si Hasiholan do, nda nunga tung na dao i goar i, naeng mambaen alasan do ho?” ninna Nai Tolopan mandok.

“Daong songoni da inang dah, inang parsonduk bolon, ndang adong na diadia”
“Ah…na godang sandiwaram, tung na hassit ma pambaenan mon…” huhut ma sai tangis nai Tolopan, Ujungna tu parbadaan ma laona. Gabe dang boi domu nasida rap mekkel lao mangan, dang adong me akka lalun dinasida, jala sai sip ma nasida nadua dijabu i.

Balik ni ari, dipatakkas si HAsiholan ma isi ni es em es i tu sekretarisna i, ima si MArsinta, disukkun ma aha maksudna. HApe si Marsinta pe dang diboto naung sala kirim es em es i, jala tutu pintor mangakku sala do ibana tu si Hasholan jala pittor ditelepon ma tu jabu nioli ni si HAsiholan i, paboahon naung sala ibana. Tutu, tangkas do diboto si MArsinta, jolma jala sahalak pimpinan na burju do si Hasiholan di kantor.

Disukkun NAi Tolopan ma boasa gabe sala kirim??

Dung sai dipamanat, dapot ma alasanna, hape molo goar ni si Hasiholan, ima atasan ni ibana dibaen si Marsinta do di hemponna i ima NAMA AWAL, HASIHOLAN. NAMA AKHIR PAK LUMBAN GAOL.

jala, ia Hallet ni ibana, dang si BONAR disimpan di hempon i, alai HASIAN do. Jadi molo niluluan sada goar di hempon i pajonok jonok ma HASIAN dohot HASIHOLAN……alani hatopna ra mangirim es em es on, dang pola dipareso be manag tudia sikirimonna, pittor di piccithon. Ujungna sala kirim ma….nga tok jim i.

Jadi asa manat-manat be hita mambaen goar di hempon, olo do gabe mamboan jea di hita, songon suhutan on.